Foto storiche

Foto di Renzo Saviolo

E1 nostro caro rion portelato che da tanta zente (sensa conossarlo) gera giudicà malcostumà.

Se solo na volta i fusse stà insieme co nialtri i gavarìa cambià idea.

Fra nialtri i gavarìa trovà la vera ami-cissia, quela che se ciama sincerità sen­sa retoriche sensa ingani.

Se te gerì considerà sincero e s-cieto te deventavi meio de un fradelo. Se po te gerì un falso amigo, no i 'ndava tanto par el sotìe. I te diseva, sensa tanti proamboli: «Te si un can e un ludro falso amigo». I te distansiava e guai a farte trovare a bassicare ancora par el rion. Podeva capitarie fra capo e colo anca na paca de sturoli.

Anca da nialtri ghe gera i famosi «buli». I gera come e guardie del rion e guai a farli danare...

Se po ghe gera qualche belimbusto che el credeva fare el furbo co le no­stre tose alora la roba se meteva male. O el combinava la fasenda ale preste o nol podeva gnanca più passare par el rion.

Questo, par fortuna, sucedeva na vol­ta ogni tanto, e le nostre tose, tute bele e formose e bone e brave na volta maridàe e dava fidussia da essare dele bo­ne mugere e dele bone mare pronte a ogni privassion par el ben de la so fameia e de so fìoi. Questa xe na roba vera che no se pole dire de no.

E anca questo fa parte dela nostra storia dela comunità del Portelo.

Attilio Reschiglian

Tuti i lo ciamava Rachele, anca se el so vero nome el jera Vittorio Gueraldi. Ai più zovani forse sto nome noi ghe dixe più de tanto o anca gnente. Poe darse che nol sia bon gnanca de farghe fisciare le rece a qualchedun de meza età parché ormai massa aqua xe passà soto i ponti da quando el nostro Rahele el xe passà nel mondo dei più. Solo magari quei del quartiere che ga i cavei bianchi da un bel toco e che i camina curvi sul baston, i poe ricordarse che Rachele el jera el soranome del “Sindaco” del Porteo.

Ma chi jerelo nea vita veramente sto omo tanto particolare?

Rachele el xe nato e el xe senpre vissuo so na casa tacà a la ponpa de l’aqua de via Ognisanti, davanti ae suore Canossiane. De mestiero el faseva el triparo nel vecio masseo de via Cornaro. El lavorava tuta la matina a rassare e a broare dopioni e sento pesse e, se no bastava, anca tuti i dopopranzi del zoba. El moeta, Fausto Pasqualotto, che el stava rente al ponte de via San Massimo lo conosseva più che ben. Dopo vere gussà i cortei, par ciaparse na palanca foravia; l’ndava a mesodì a portarghe da magnare par conto de serti so parenti, a un so amigo de nome Betio che el faseva el scorteghin dentro el masseo.

Co sta scusa Fausto el jera senpre in contato co Rachele col quae, co jera posibie, el ’ndava a bagnarse el gargato da Ganba, queo che gaveva l’ostaria davanti al masseo. Chi lo ga conossuo de persona, el poe ben contare che Rachele nol dispressava afato el goto de vin e co l’alsava massa el gomio a vegneva fora daa so boca dee ache... che faseva resussitare anca i morti. Le simie che‘l ciapava le jera solo de do sorte, invesse che quatro. Mai na volta che el gavesse in corpo na bala pianzota o selvaja.

Le sue jera solo dee bae ridaroe o imusonà. Ghe piaseva l’alegria e par questo el declamava Orassio o Dante. Ogni tanto, co el caminava soto i porteghi a testa bassa col muso longo, qualchedun no trovava de mejo de cojonarlo de scondon sigandoghe in dueto co naltro conpare de schersi: “Racheleee... cu... la”. A ste ofese Rachele el scopiava daa rabia e el tacava subito a sigare ai quatro cantoni: “Fioj de cani... vigni fora che ve tajo le rece! Vigni fora che ve vardo nel muso e ve fasso cavare la tessera del pan dei poareti”.

Ma a Rachele in fondo tuti i ghe voeva un ben del diavolo parché el jera un personajo in fondo tanto bon e unico nel so genere. No ghe mancava de serto la parlantina e propio par el so discorare fassie, come queo de un avocato, i lo ciamava el Sindaco. Anca parché el saveva tuto de tuti, parfin cossa che casa i magnava in tola. Forse, però, el vero motivo del soranome el jera un altro. Nee grande feste del Porteo, Rachele el jera soito vestirse col frak co traverso na fassa colorà a tracola. Pontà sul peto el portava na pataca col stema del Comune e de serto, parvia de tuta sta ponpamagna, el titolo de Sindaco el jera el minimo che i podeva darghe.

Rachele nol jera tanto alto de statura e fin da puteo el sofriva de reumatismi. El so soranome el derivava dal fato che el jera rachitico, insoma. Più che caminare, el se strassinava par no cascare partera aiuta da do crossoete fate ala manco pezo. Fato stà che sto toseto nol podeva cressare più de tanto a causa dea malatia. Dati i tenpi, i dotori no i saveva cossa farghe e che medissine darghe. No restava che pregare... E cussi a son de dire tante orassion, xe capità che un bel dì nostro Segnore el ga scoltà le supliche dea pora zente e el ga fato el miracolo. Rachele tuto de un trato el ga butà via le crossoete e el se ga messo a corare da solo davanti ai oci de tuti. Par riconossensa el ga pensa ben de donarghele a Sant’Antonio come grassia ricevuta. Le ga messe cussi ai pie dea statua del Santo che la se trova dentro al capiteo dea del ponte de Porta Porteo. Propio dove, un tenpo no tanto lontan, nel di de l’Imacolata i barcaroi i portava in procession la Madona a trovare “so moroso”. Ancora desso chi che voe renderse conto de sto fato poe farse na caminada fin sul ponte e dentro al capiteo, iluminà giorno e note, el vedará posae al muro de l’altareto le do crossoete donae da Rachele, el Sindaco del Porteo.

Franco Holzer

(da "L'Arca di Noè" dicembre 1997)

- Foto: Le stampele de Rachele dentro al Capitèo

Franco Holzer

(Arca di Noè 1997)

Storie porteate

I ME RICORDI

(di Berto Bernardo classe 1907)

Guera 1915/18. Quando che sonava l'alarme se la toevino a ganbe, 'ndando verso i rifugi: — uno gera dentro la Porta Porteo e n'altro in Patronato (i gaveva sarà i porteghi co tanti sacheti de sabia, tegnù saldi da dee toe inciodà). Uno el se trovava anca in prinsipio de l’arzare, rinforsà co dei pai e de sora tanti sacheti de sabia (par fortuna che là bonbe no ghe ne xe mai casca!). N'altro el gera sta fato vissin ai scaini del numaro 9 dee case operaie; là se gheva fato un buso e co 'na scaeta se 'ndava soto, dove che gera tuto vodo, e caminavino fin che rivavino pressapoco soto a e camare, parchè disevino che se la bonba fusse casca drita la gavaria trovà i leti che la... fermava. Là se se trovava senpre in 'na sinquantina più qualche fiasco de vin par farse... corajo. Senpre in ‘sta guera, nee case operaie, quee fate a sete, nee loze de l'ultimo pian ala sera ghe 'ndavà su i soldai e quando che de note rivava i reoplanl par bonbardare, lori i doveva sercare de butarli zò a ...

s-ciopetà.

Varda ti dove che xe sta inventà la «contraerea»!

La “careta” dela Madona

De ’na careta la ga le stanghe, la piataforma, le s-cione; le rode gera le gambe dei portatori.

Sula careta, al’Imacolata, vien intronizza la Madona; che sovrasta el trono ghe xe dele colone de legno dorà formae da foie de acanto che se unisse in alto a formare ’na co­rona, segno de la regalità de Maria.

Quasi tuti conosse in che circostanse la statua de la Madona xe arivà nela nostra cesa: durante ’na aluvion sta Statua xe sta vista galegiare vissin la riva nel Piovego de fronte a la Madoneta de piera che gera stà colloca in una nicchia, ricavà nel murasso, vissin al capiteo de S. Anto­nio, fora de porta Porteo (go dito gera, parché qualche ano fa un... devoto se la gà porta via par colocarla in qualche botega de antiqua­rio). Dei pescadori la ga tira a riva e dopo porta al paroco.

Son abastanza vecio par ricordare le procession che se faseva all’Imacolata nei ani anteguera... non quea del 15-18, ostrega, ma dea se­conda.

Me ricordo che ai me tempi, qualche giorno prima dea solenità, i fachini del Porteo soto la diression de un certo “Carbonea”, me pare che cussi el se ciamasse, provava in ciesa tuti i movimenti par portare la Madona su la careta par le vie del rion.

Abituai ale fadighe, par lori gera abastanza facile caricarse sule spale quel peso che no gera certo indifarente.

Nel giorno dela procession po’ i faseva el pieno de graspa che ghe dava el più cento.

Anime benedete, però se ghe gera qualche sbandada, i tirava anca dee sarache.

Ma le generassion dei fachini un poco ala volta xe andà scomparendo, alora se ga fato ’vanti i tosi del patronato, i più robusti ma anca i più entusiasti.

E no i xe sta da meno dei predecessori.

E qua me fermo, parché compito mio xe cercare de riciamare ala memoria qualche episodio che serva a ricordare fati e personagi più o meno conossui dai porteati, ma del tuto ignoti ai extracomunitari (par extracomunitari intendo quei che xe subentrà ai veci porteati, che xe sta dispersi ai quatro venti nel comune e provincia di Padova).

Gero puteo e ricordo che ’na matina me trovavo in cano­nica, quando monsignor Sabadini ga ricevù da na “gafa” l’ingiunsion de pagare ’na multa parché, me pare, gera sta espo­sti dei drapi senza permesso durante la procession. De fronte a ste provocassion monsi­gnor perdeva le staffe: lo go sentio urlare e protestare co tanta violenza che ancora no me rendo conto come no se gabia staccà i quadri dae pa­reti.

La gafa se ga ritira in bon ordine e il giorno dopo Monsignor ga indossà la ve­ste de canonico coi botoni rossi, el xe andà da l’autorità competente e la multa xe rientrà.

A proposito, quea veste gera la so arma segreta: in­dossandola el riusciva a spuntarla da partuto. El se la tegneva da conto; el ghe ne gaveva un’altra, sua pure quea, che la Gilda, la perpe­tua, a furia de repassarghe l’ago riussiva a far sì che no la cascasse a tochi.

Cossa gavaria podudo pagare quel benedeto omo che, se el gaveva qualche franco, subito el trovava qual­che povera dona del Porteo che ghe lo tirava fora dala scarsea.

El gera un primo segnale dele angherie che i fascisti gavaria usà dopo par rendare dificile la vita del patronato, preocupai parché i tosi ae adunate preferiva le atività che la parochia ofriva. Ricordo che ghe xe sta un tentativo da parte dei neri de dare fogo ae porte del patronato; i dani xe sta legeri e no ghe xe sta altri guai; anca parché a fare la guardia ghe gera don Luigi Perin e Girardi Edoardo che gaveva certi tiras­si da far paura.

Sentì anca questa: i portatori de la careta i doveva stras­sinare i pie, non camminare, parché la careta andasse vanti sensa scossoni.

I dise che el giorno dopo ghe gera da fare par i savatini del Porteo, par metare qualche scaia sule sole consumà dee scarpe.

 Luciano Gasparin

 (da “L’Arca di Noè” 1990)

CESCO

Portèo gennaio 2021